UTHEMBISE ukugqugquzela ukubambisana phakathi koNdlunkulu beSilo esebuzile uGoodwill Zwelithini, uMdlokombane, uNdlunkulu waso wesihlanu uNompumelelo MaMchiza Zulu (osesithombeni).
UMaMchiza ubekhuluma emci-mbini wokuhlonipha oNdlunkulu bakaMdlokombane abayisithupha, obuhlelwe ngamalungu ePhalamende, obuseNkosi Albert Luthuli International Convention Centre, eThekwini, ngoLwesine. Lo mcimbi ubuhanjelwe yizicukuthwane okubalwa kuzo amakhosi esizwe sakwaZulu, awakwezinye izifundazwe noMnu Jacob Zuma, oke waba ngumengameli wezwe.
Ekhuluma egameni loNdlunkulu uMaMchiza, uveze ukuthi bazimisele ngokubambisana nabanye oNdlunkulu ukugcina igama likaMdlokombane nomlando wakwaZulu wonkana, uphila.
“UMdlokombane ubenamaphupho amahle ngesizwe sakwaZulu, zonke izigodlo zakhe wayezibekele amaphrojekthi ayefisa enzeke uma esegubha iminyaka ewu-50 esesihlalweni. Lezo zinhlelo kazimile, nathi singoNdlunkulu bezigodlo sibambisene, futhi sizoqhubeka sibambisane ukuqinisekisa ukuthi ziyafezeka.
“Angifuni ukukukhulumela eziko okunye osekuqalile ukwenzeka, kodwa kuzobonakala maduze futhi nami ngiyobuye ngichaze ngakho. Phezu kwalokho, kuningi okunye okuzosithuthukisa singoNdlunkulu esikwenzayo. Ngikhuluma nje ngike ngaya phesheya ngabuya nezinsiza zolimo ezizolekelela ondlunkulu emsebenzini wabo wezolimo,” esho.
Ubonge ukukhunjulwa nokuhlonishwa kwabo yiPhalamende. UZuma ushayele ihlombe amalungu ePhalamende abehamba phambili ekuhlelweni kwalo mcimbi. Uthi ukholwa wukuthi ukuhlonishwa kondlunkulu yinto ebalulekile njengoba bengabanye babantu abawumgogodla wesizwe saKwaZulu.
“Le nto eyenzekayo ibuyisa isithunzi nesigqi somuntu omnyama, ikakhulukazi abakwaZulu. Kuyathokozisa ukuthi amalungu ePhalamende ahlele ukukhumbula isizwe sakwaZulu, kukhombisa ukuthi noma nisePhalamende niyikhumbule imigogodla yesizwe sakwaZulu, nikhumbule oNdlunkulu, neSilo uMdlokombane imbala noma singasekho phakathi kwethu. Lokhu kunginika ithemba lokuthi umlando wakwaZulu ngeke ushabalale,” esho.
ONdlukulu okunguSibongile MaDlamini, waKwaKhethomthandayo, uNdlunkulu Buhle KaMathe, waKwaDlamahlahla, uNdlunkulu Mantfombi Dlamini, ongasekho, waKwaKhangelamankengane, uNdlunkulu Thandekile MaNdlovu, waKwaLinduzulu, uNdlunkulu MaMchiza, waseNyokeni noNdlunkulu Zola KaMafu, wasoNdini bahlonishwe ngezipho ezehlukene.
