AMAPHOYISA axwayisa abantu ngobungozi bokucosha imali uma izigebengu ziqeda ukuqhumisa imoto yemali. Lokhu kuza ngemuva kokuba kudubuleke abantu ababili abebezimele eceleni, ‘belinde ukucosha’, ngesikhathi kudubulana onogada nezigebengu ebezibamba imoto yemali eDawn Park, eGauteng, izolo ngoMsombuluko.
Okhulumela amaphoyisa aseGauteng uCol Dimakatso Nevhuhulwi uthi abasolwa abawu-8 abebehamba ngemoto yohlobo lweMercedes-Benz bashayise imoto yemali ngemuva, yashayisa itekisi ebingaphambili, yase igingqika. Kuthiwa babe sebeyiqhumisa le moto, bashaya bachitha nesamba semali esingakadalulwa.
Uthi kube nokudubulana phakathi kwabasolwa nonogada, kwadubuleka abantu ababili abebezimele eceleni, bashona.
“Amaphoyisa anxusa abantu ukungasondeli ezigamekweni zokubanjwa kwemoto yemali, futhi bangazami ukucosha imali uma imoto isiqhunyisiwe, izigebengu sezibalekile,” kusho uCol Nevhuhulwi.
Uthe abantu kumele bahlale beqaphile la abakhona futhi basheshe babikele amaphoyisa uma bebona izenzo zobugebengu noma okusolisayo.
Namuhla ngoLwesibili amaphoyisa athi ancinzwe indlebe ngokubonakala kwemoto esolwa ngokubandakanyeka esigamekweni sokuqhunyiswa kwemoto yemali emzini oseRondebult, eGermiston. Kuthiwa afike khona abopha umsolwa oyedwa otholakale nemali engcoliswe wudayi, isibhamu nezinhlamvu, nezimoto ezimbili okukholakala ukuthi zisetshenziswe kubanjwa imoto yemali.
