Isithombe: MZWAMANDLA ZONDI
UBUZINYAZISWE nguMengameli we-IFP, uMnu Velenkosini Hlabisa, umcimbi wokuhlonipha abagijimi beBlack Diamond, abaphakamise igama lale kilabhu esifundazweni naseNingizimu Afrika yonkana.
Le kilabhu eneminyaka engaphansi kwemihlanu ikhona ixhaswe yi-Ibhele Nabangani Consulting, kanti lo mcimbi obuse-Exhibition Centre eThekwini ubuhlanganise nowokuvala unyaka wezisebenzi zale nkampani.
Umsubathi ohlumule ngomklomelo omkhulu nguRufus Photo obe yi-Athlete of the year Year, wahlomula ngo-R30 000.
Kwabesifazane kugqame uBusisiwe Chamane, othole imiklomelo eminingi. Lo msubathi ekuqaleni konyaka ungene unombolo 6 kwiTwo Oceans Ultra Marathon.
Abanye abavelele kube nguSiyabonga Ndlovu, nguBanele Mabizela, nguBongelani Mkhwanazi, ukubala nje abambalwa.
UHlabisa uthe: “Kuyintokozo ukuba ngibe yingxenye yalo mcimbi ohlelwe yiBhele Nabangani, okuyinkampani yomuntu wesifazane omnyama. Ngiyafisa ukuthi nezinye izinkampani ukuba zisike iphethini kwiBhele Nabangani.
“Ukuba yingxenye yezokugijima kwentsha kuyayisiza ukuba ingangeni ezidakamizweni nokunye okungalungile. Abanye baxosha ikati eziko ngalokhu abakutholayo. Ngiyababongela bonke abasubathi beBlack Diamond ngokusebenza ngokuzikhandla.
“Ngiyathembisa ukuthi nami ngizokube ngikhona kulo mcimbi ngonyaka ozayo. Uma ekhona amandla mhlawumbe kukhona engofika nakho ukuze kusizakale intsha.”
Lo mcimbi ubuhanjelwe ngabaculi abehlukene kanti omunye wabo bekuwuGatsheni.
