UNDUNANKULU waKwaZulu Natal uMnu Thami Ntuli ushayele ihlombe amaphoyisa ngokubopha ngokushesha abasolwa abahlanu abagasele kwelinye lama-container, azitapela izimpahla elokishini laseMpumalanga eHammarsdale izolo ebusuku.
Ngokusho kwamaphoyisa, athole umbiko ngeqeqebane labantu abakhethe ukuhlangana bazitapele izimpahla kulesi sitolo esise-Unit 4, eWoody Glen, khona eHammarsdale. Amaphoyisa anikele kule ndawo ngokushesha afica omunye wabasolwa esengaphakathi kule container abe esemshaqa.
Aqhubekile nokujaha abanye abasolwa, agcina ngokubopha abahlanu sebebonke okubalwa kubo noneminyaka ewu-14 ubudala. UNtuli uwashayele ihlombe amaphoyisa ngokusebenza ngokushesha ukubopha laba basolwa.
UNtuli unxuse bonke abayingxenye yemibhikisho ezinkalweni ezahlukene neKwaZulu Natal ukuba baziphathe ngendlela efanele futhi baqinisekise ukuthi ukubhikisha kwabo kuhambisana nomthetho.
Khona manjalo iyaqhubeka imibhikisho emadolobheni ahlukene nezwe. Kuzokhumbuleka ukuthi le mibhikisho iqhamuka ngemuva kokubekwa kosuku lwangomhla ka-30 kuJune 2026 njengoluwumnqamulajuqu kwalabo abakuleli ngokungemthetho.
Lolu suku lwabekwa nguNkosikhona “Phakel’umthakathi” Ndabandaba ongomunye wabahola le mibhikisho ngaphansi kwenhlangano yakhe Insizwa nobuNsizwa, eyeseka iMarch And March eholwa nguJacinta Ngobese-Zuma.
NgoMsombuluko kusihlwa uMengameli Cyril Ramaphosa ubambe umhlangano noNdabandaba noNgizwe Mchunu ngenhloso yokuthi baqinisekise ukuthi imibhikisho yangoLwesibili izoba nokuthula futhi ayikho impahla ezolinyazwa.
