KUQHAKANJISWE amagalelo kowagqama ngokusabalalisa inyunyana yothisha nakwezinye izifundazwe ngenxa yokwazi kwakhe ukukhuluma zonke izilimi zakuleli, ngesikhathi engcwatshwa ngoMgqibelo. UMnu Velaphi Ndlovu owayayisekela lowayenguMengameli weNational Teachers Union (Natu) uMnu Sphosethu Ngcobo, kuvezwe umlando wakhe ojulile ekuphakamiseni iNatu. UMengameli weNatu uMnu Sbusiso Malinga, uthe wayehlakaniphe kakhulu uMnu Ndlovu. Uthi ukuhlakanipha kwakhe kuyilekelele kakhulu lenyunyana.
“Ukufika kwakhe kuNatu kwabayisibusiso ngoba usilekelelile ngokufaka inyunyana nakwezinye izifundazwe eqale esifundazweni eMpumalanga, wayikhulisa inyunyana yangena eLimpompo, Eastern Cape nakwezinye izindawo. Ubekwazi nokumela othisha ngendlela enhle emnyangweni wezemfundo esebenzisa ikhono lakhe nokuhleleka eqinisekisa ukuthi isithunzi sobuthishela siyahlonipheka,” kusho uMnu Malinga.
Uthi ukusebenza ngokuzimisela kukaMnu Ndlovu, kubonakale ngokuthi akazange akhishwe ngevoti nasesikhundleni sakhe iminyaka ewu-13 eqhwakele lesi sikhundla, uhlalile waze waziphumela. Uthi lokhu bekukhombisa ukuthi ubuholi bakhe buqotho buyathandwa ngamalungu enyunyana.
“Wayelwela ukuthi iNatu ingagcini kuyinyunyana yakwaZulu-Natal kuphela,” esho. Uthe bashayekile ngokudlula kwakhe emhlabeni. UMnu Ndlovu kuthiwa ugule isikhashana washona.
Mthobisis@ilanganews.co.za
