UFUNA ubulungiswa owesifazane (34) waseVryheid othi wajikelwa ngumngani wakhe wesilisa (38) weminyaka, wamnukubeza ngokocansi, maqede wangaphika, futhi wangakhombisa ukuzisola.
ILANGA likhulume nalo wesifazane eligodliwe igama lakhe ukumvikela, osakhihla isililo sengathi lesi sigameko senzeke izolo, olilandise ngalolu daba athi ugcine esethola izinsongo kwabasondelene nalo wesilisa abakhula naye, bemvimba ukuthi angamvuleli icala.
Uthi lesi sigameko senzeka kwelinye lamahhotela akhona eVryheid ngo-2021, ngemuva kokuthi ekhothe weqisa ezinkambeni zikaFaro, wazumeka.
“Sasinomcimbi i-All White Party, ngakusasa sayoqedela iziphuzo ezazisalile, kwathengwa nezinye. Mina-ke ngaphuza ngeqisa, ngabe sengizumeka, okuyilapho engathathwa khona ngomunye umngani wami wesifazane, wathi angimphelezele aye kwelinye ihhotela elalizolala isoka lakhe elisebenza eMpumalanga. Umngani wethu lo wesilisa (umsolwa) wayekhona emotweni,” esho.
Uthi kulolu hambo waphinde wazumeka, waphaphama sebesehhotela, umngani wakhe owayecele ukuphelezelwa esemtshela ukuthi umsolwa usekhokhele igumbi ayezolala kulo (umgilwa), okuyilapho okwenzeka khona lesi sigameko.
“Wangihambisa kulelo gumbi, lapho engafika ngaziphonsa embhedeni ngingakhumulile nezicathulo. Ngaphaphama phakathi nobusuku ngizwa ukuthi kukhona umuntu ongithintayo kwesingezansi ngasesithweni sangasese, kodwa ngenxa yokuthi ngangiphuze kakhulu ngavele nga zumeka.
“Ngathi uma ngiphaphama ekuseni, ngaqaphela ukuthi kwesingezansi kangigqoke lutho kodwa ngenhla ngangisakugqoke konke. Eceleni kwami kwakukhona u(emgagula ngegama) engagqokile. Ngathi uma ngimbuza ukuthi ungenzeni, wangibuka nje,” esho.
Uthi umsolwa wagcina evumile ukuthi umdlwengulile, wangakhombisa ukuzisola. Uthi obekumenza abe manqika ukuvula icala wukuthi ubethola izingcingo ezimesabisa ngokumenzakalisa uma elivula, nokuthi wayephuzile, engenalo ithemba lokuthi ubulungiswa uzobuthola.
Uveze ukuthi ubhoboke esokeni lakhe ngalolu daba ngonyaka odlule, okuyilo elimelekelele waze wakwazi ukuvula icala, eligcine livuleke ngenyanga eyedlule, lazama (isoka) nokumtholela usizo lokwelulekwa ngokomqondo.
“Sengilivulile icala, bakhona abebengisabisa bethi angilicishe, sixoxisane nomsolwa. Bengingenayo inkinga yokuxoxisana naye ngoba nabakubo ngabatshela ukuthi singaxoxisana kuphela nje uma kuzoba namaphoyisa azolalela esizobe sikukhuluma, okwagcina kungenzekanga” ephetha.
Okhulumela amaphoyisa KwaZuluNatal, uCol Robert Netshiunda usiqinisekisile isigameko. Uthe owesilisa oneminyaka ewu-38 uboshwe ngabaphenya amacala ocansi nokuhlukunyezwa kwezingane, wavela kafushane eNkantolo yeMantshi yaseVryheid ngoLwesithathu olwedlule.
