UBALISA ngobunzima obuhaqe abadlali bakhe uMiguel Cardoso ongumqeqeshi weMamelodi Sundowns eguqise iKaizer Chiefs ngo-1-0 koweBetway Premiership ngoMgqibelo ntambama eLucas Moripe Stadium, e-Atteridgeville.
Igoli leDowns lishaywe nguLucas Ribeiro.
UCardoso – ubalisa ngobunzima obubhekebe nabadlali bakhe nje – yingoba ezakhe zizobhekana neLamontville Golden Arrows koweligi kusasa ngoLwesithathu ngo-19h30 eMpumalanga Stadium, eHammarsdale.
“Lo mdlalo ubunzima, iChiefs ize nesu elenze kwanzima kakhulu. Ziningi-ke nokho izinto eziholele ekutheni kube nzima. Abafana bami bebekhathele, kunzima ukuba yithina, imidlalo yethu icinene.
“Indlela abafana bami abebekhathele ngayo, yenze kwabanzima nokuthi sidlale ibhola lethu.
“Kodwa-ke kukhona konke lokho, ngibancengile ukuba bazibambe ziqine. Nangempela benza kanjalo. Nangesikhathi sekhefu sesikorile, ngibacele ukuba babe nesibindi, basebenze ngokubambisana.
“Kasizange sibe nomdlalo omuhle, kodwa sijabule ngempumelelo yekilabhu,” esho.
Uthe umsebenzi kabakawuphothuli, iseyinde indlela ebheke ekuvikeleni ngempumelelo lesi sicoco sabo seligi asebesiqukule amasizini ayisikhombisa elandelana.
“Sibhekene neGolden Arrows manje, kufanele senze isiqiniseko sokuthi abadlali baphumula ngokwanele, yize kungeke kube lula. Kodwa nginesiqiniseko sokuthi nawo lo mdlalo sizowunqoba,” kusho lo mqeqeshi othathe lesi sigqiki okugudluzwe kusona uManqoba Mngqithi.
