UMENGAMELi Cyril Ramaphosa usegxeke i-Afriforum neSolidarity ngohambo lwabo lwase-United States of America, ukuyoxoxisana naleliya lizwe ngezinkinga zakuleli.
Usole lezi zinhlangano ngokukwakha itulo nabantu bangaphandle abanamandla, ukubukela phansi isithunzi seNingizimu Afrika.
Ramaphosa uveze lokhu ephendula imibuzo yamalungu ePhalamende izolo ngoLwesibili. Uveze ukuthi iNingizimu Afrika izimisele ukuqhubeka nobudlelwano bokuhwebelana neMelika.
Ebuzwa ngodaba lothuthuva oluseDemocratic Republic of Congo, uRamaphosa uthe kusasa ngoLwesine iSADC izoba nengqungquthela yokudingida ngesimo sezokuphepha kuleliya lizwe.
Uthe okunye okuzodingidwa kule ngqungquthela wudaba lokuhoxa kwamasosha akuleli atshalwe eDRC ngezamo yokudala ukuthula.
Kuzokhumbuleka emasontweni edlule kushone amasosha akuleli awu-14, okuthiwa abulawe ngamalungu amavukelambuso iM23, khona eDRC.
