USEXWAYISA ngodlame olubhekiswe kwabesifazane, nezingane owesifazane owasinda egwazwa amanxeba awu-108, ngowayeyisoka lakhe elalingafuni ukwaliwa.
UNkz Nqobile Shobede (34) osephila nezibazi zamanxeba ezigcwele ubuso nezinye izingxenye zomzimba futhi osehamba ngenduku, usephenduke isishoshovu sokuxwayisa ngalolu dlame oludla lubi endaweni yaseMbabe, kuwadi 8, KwaMbonambi.
NgoLwesibili uNdunankulu waKwaZulu-Natal, uMnu Thami Ntuli uhambele kule ndawo ngenhloso yokuyokwethula ithimba labazoba sohlakeni lokulwa nobu-gebengu ezindaweni ezingaphansi kukaMasipala waseMfolozi. UNtuli ukhale ngalolu dlame kule ndawo, nokwebiwa kwezimoto ikakhulukazi eDondotha. UNtuli wethule uhlaka oluhlanganisa abesilisa nabesifazane, abancane nabadala abazobambisana namaphoyisa ukulwa nobugebengu endaweni.
Unxuse ukuba kube nokubambisana phakathi komphakathi namaphoyisa. Undunankulu uxwayise amalungu esiKebhe ukuba afunde ukusebenzisana namaphoyisa, angazibambeli umthetho.
Amalungu omphakathi abephume ngobuningi, athole nethuba lokudlulisa izikhalo zawo kuNtuli ngezigameko eziqhubekayo endaweni, njengoba esinye sezikhalo kube ngesokutholakala kwezidu-mbu zamantombazane endaweni. Kuvele ukuthi seziziningi izigameko esezibikiwe ngalokhu ezindaweni ezahlukene ngaphansi kwalo masipala.
UMnu Xolani Bhengu oyiMeya yaseMfolozi uthe, kuyabakhathaza ukwanda kokusocongwa kwabantu. Ezigamekweni zakamuva, kuvela ukuthi abalelwa ku-7 amantombazane atholakale ebulewe esikhathini esifushane.
“Esikutholayo wukuthi iningi labo libulawa ngabesilisa elitha-ndana nabo, okuyinto esikhathazayo njengomasipala,” kusho uBhengu. Uthi kuletha ithemba ukuya komkhankaso kandunankulu kuleya ndawo.
ILANGA lixoxisane noNkz Shobede ongesinye sezisulu ezasinda odlameni olubhekiswe kwabesifazane nezingane, osephenduke isi-shoshovu sokulwa nalolu dlame. Elandisa ngokuhlaselwa kwakhe okwamshiya ephila nokukhubazeka, uthe kwenzeka ngo-2017, owesilisa ayethandana naye wayengafuni ukwaliwa.
“Wangihlasela ekhaya ngihleli nezingane zasekhaya, wafike wangigwaza, esho ukungibulala,” kusho uNkz Shobede. Uveze ukuthi umsolwa wayegxile ebusweni, ngesikhathi emgwaza, ekhombisa ukuba nolaka nodlame oluyisimanga.
Uthe ngesikhathi kwenzeka lesi sigameko, kwanguyena okhona omdala ekhaya kubo. Uqhuba ngokuthi wasinda ngenhlanhla kulesi sigameko, waze wagwazeka nomsipha okwenza ukuba angabe esakwazi ukuzihambela kahle.
“Ngahlala esihlalweni esinamasondo izinyanga, ngingakwazi ukuhamba ngemuva kokusinda” kusho uNkz Shobede. Uthi nakuba umsolwa waboshwa wagwetshwa iminyaka ewu-8, kodwa wagcina ehlala emine kuphela.
