UXOSHISWE wukushaya into ephansi ekubeni ehola ‘itshe lemali’ uPercy Tau (31) ekilabhini yeziqumama zaseQatar ayijoyine ngoJanuwari njengoba eseyamaniswa neKaizer Chiefs.
UTau ujoyine iQatar SC egijima kwiQatar Stars League nonyaka.Ubekade esuka kwi-Al Ahly yase-Egypt abesehlale iminyaka kuyona. Ubesayine inkontileka yezinyanga eziwu-6 kule kilabhu yaseQatar.
Inqume ukungayeluli njengoba ikholwa wukuthi akazange enze ebikulindele. Emidlalweni ewu-9 wakhe amagoli amabili akangashaya ngisho elilodwa.
“UTau ufike kule kilabhu isimo sisibi imiphumela igqoza. Ngenxa yamagalelo akhe kwi-Al Ahly, abaphathi bebenethemba lokuthi uzofika nomehluko.
Badumele uma efika eshaya ephansi ekubeni ehola imali enkulu.
“IChiefs isukumele phezulu uma izwa ukuthi lo mdlali uthe angawuthatha umholo ka-R450 000 okuyimali engamunika yona leyo ngaphandle kwenkinga,” kusho umthombo.
Imizamo yokuthola umphathi kaTau, uMmatsatsi Sefalafala iphunzile njengoba ucingo lwakhe belungangeni.
Kuvela ukuthi uSefalafala unezinkinga noSARS njengoba kuthiwa umugixabeze ngesikweletu sika-R8,4 million.
