LUCKY CAIN
KONKE sekumi ngomumo ngohlelo lukamabonakude lokuhlanganisa abantu abangazani bahlale endlini eyodwa izinyanga ezintathu, olubizwa ngokuthi yiBig Brother Mzansi, olukhonjiswa esiteshini esiyisipesheli iChannel 198.
Lolu hlelo luzoqala ukukhonjiswa namhlanje ngeSonto lapho kuzobe kwethulwa abazobe belungenele kulo nyaka. Kulindeleke ukuthi kule sizini yesihlanu yalolu hlelo kushube njengoba isiqubulo salo nyaka sithi Umlilo. Lubuya nomethuli omusha uSmash Africa ongena ezicathulweni zikaLawrence Maleka obekunguyena obelwethula phambilini.
IBig Brother Mzansi isikhiqize iqwaba yosaziwayo njengoba phakathi kwalabo abaqale ukuzakhela udumo kulolu hlelo kubalwa uSol Phenduka ongumsakazi weKay FM, Thato osengumsakazi weMetro FM, Ntombi no-Ace, Themba Broly osenohlelo lwakhe kumabonakude nabanye.
Kuzokhumbuleka ukuthi ngonyaka owedlule uMcJunior odabuka eBulwer nguyena odle umhlanganiso kulolu hlelo. Kubhekwe ukuthi imithetho iqine kulo nyaka njengoba ngonyaka owedlule lolu hlelo lwaba sematheni kulandela ukuba nezigameko zokunukubeza ngokocansi ezagcina ziholele ekutheni kukhonjwe indlela omunye wababelungenele.
