UMKHONTO weSizwe Party (MKP) uchithe esikhundleni unobhala jikelele weqembu, uMnu Sibonelo Nomvalo wafaka, uNkz Lindiwe Mtshali esikhundleni sakhe.
Izinguquko zenzeke emva kophenyo lwangaphakathi oluveza ukuthi uNomvalo kukhona izinto angazihambisi kahle eqenjini njengonobhala. Usolwa ngokungahambisi kahle uhlelo lokukhethwa kwamakhansela aqokelwe ukungenela ukhetho lohulumeni basekhaya, ukubhebhezela uqhekeko ngaphakathi eqenjini, ukudembesela ukuqhuba umkhankaso weqembu njengoba kuza ukhetho, ukungazisukumeli izinto ezibikwe esigungwini seMKP sasephalamende nokungambikeli umengameli weqembu ngakho konke okuqhubekayo.
Lezi zinto kuthiwa zidale ukuthi kube nokukhathazeka ngaphakathi eqenjini ukuthi libhekephi. Iqembu likubongile ukulisebenzela kwakhe njengonobhala lamfisela inhlanhla ezintweni asazozenza ngomuso. Unxuswe ukuthi abambisane neqembu avumele izinguquko njengoba sekuqokwe esikhundleni sakhe uNkz Mtshali ozobamba njengonobhala weqembu. Kuthiwe uNkz Mtshali uzosebenza ngokubambisana noSihlalo kazwelonke weqembu, uMnu Mxolisi Phakathi. Okhulumela iqembu uMnu Sfiso Mahlangu yena uphinde wanikwa umsebenzi wokuba yisekela likaNobhala weqembu aphinde aqhubeke nokuba ngumkhulumeli weqembu.
ILANGA lithole ukuthi ukuphenywa kukaNomvalo bese kunesikhathi kuqhubeka ngaphakathi. Kuthiwa kukhona olunye uphenyo olungakaphothulwa ngaye. Njengamanje useyilungu leqembu elejwayelekile. Ngokwezikhundla usele nesokuba yilungu lephalamende leMKP.
tndlovu@ilanganews.co.za
