USESULILE emaphoyiseni uSergeant Fannie Nkosi olokhu agcinwa esitokisini kusuka ngoNdasa (March) nonyaka ngamacala ehlukene.
Okhulumela amaPhoyisa kuzwelonke uBrigadier Athlenda Mathe ukuqinisekisile ukwesula kukaNkosi kodwa wathi asikho isinqumo esesithathiwe ngokwesula kwakhe ngaphandle kokuthi basamukele incwadi ayithumele.
UNkosi selokhu agcinwa esitokisini kusuka ngoNdasa (March) nonyaka ngamacala ehlukene njengoba engakaze anikwe nebheyili. Ubhekene namacala amaningi okukhona kuwona elenkohlakalo, ukweba, ukushushumbisa imali, ukuphazamisa ukusebenza komthetho, ukutholakala kwamadokodo amaphoyisa emzini wakhe osePretoria North, isibhamu nezinhlamvu kanjalo nemali engu-52 700 eyigcine endlini.
UNkosi oboshwe emva kokuvela kwiMadlanga Commission, ugcine enkantolo yeMantshi yasePitoli ngomhlaka 15 kuMfumfu (October).
Njengoba esanqatshelwa ibheyili, ubefake isicelo sokuthi kube nezethulo azenzayo njengoba ezama ukuthi kusulwe amacala abhekene nawo. Inkantolo ithathe isinqumo sokuthi ihlehlisele umhlaka 5 kuLwezi (November) icala lakhe lapho kuzolalelwa khona lezi zithulo zakhe.
UNkosi usolwa nangokuthi uyena obesiza usomabhizinisi oboshelwe amacala amaningi, uMnu Vusumuzi “Cat” Matlala ngokuthi amazise uma kunophenyo oluzokwenziwa emzini wakhe njengoba kuthiwa ungomunye wamaphoyisa obesephaketheni lalo somabhizinisi oyamaniswa neqembu lezigebengu ezisatshwayo.
