UMASIPALA waKwaDukuza, oholwa yiMeya uMnu Sduduzo Gumede ugubhe usuku lwentsha, ngoLwesibili, ngokuvundulula amakhono ahlukene entsheni ukuze ikwazi ukuziphilisa ngawo, eMulti-Purpose Centre Sport Ground, eGlenhills.
IKwaDukuza inomlando ovundile kuleli njengoba kuvela khona isishoshovu somzabalazo wenkululeko uChief Albert Luthuli, owaba ngowokuqala omnyama emhlabeni ukuhlabana ngeNobel Peace Prize ngo-1960.
“Kubalulekile ukuba kuyona yonke into oyenzayo usebenzisana nentsha. ENingizimu Afrika sibhekene nenkinga yesibalo esiphezulu sentsha engasebenzi. Njengohulumeni, sithe asifake isandla, simeme intsha izobonakalisa ithalente layo ukuze siyisize ukulikhulisa. Okuhle ukuthi kulolu hlelo lwethu sisebenzisana noMnyango wezemiDlalo ubuBuciko namaSiko okuyiwona ozosisiza ukuqinisekisa ukuthi senza into okuyiyona,”kusho iMeya.
Yengeze ngokuthi intsha kufanele isondele kumasipala ukuze yazi ngezinhlelo onazo eziqondene nayo.
UNokulunga Feziwe Shandu owenza ezobuciko ezincike kakhulu kwimvelo, uthe ujabule kakhulu ngokuba yingxenye yalo luhlelo olwenziwe wuMasipala waKwaDukuza. Uthe ukukhombisa imisebenzi yabo nokuhlangana nabanye abantu kumjabulise kakhulu.
