BAZOKWAKHA uzinzo ngokuhlelwa kwemidlalo yebhola yothisha kwinyunyana ebekade kungabonwa ngaso linye kuyona emuva kwengqungquthela yokukhethwa kobuholi obusha nyakanye.
INational Teachers Union (Natu) ihlele imidlalo yothisha mhlaka 25 no 26 kuyona lenyanga ezinkundleni zemidlalo eCurriesFountain eThekwini.
UMengameli weNatu uMnu Sbusiso Malinga, uthe inhloso enkulu yezemidlalo ngukuthi bahlangane othisha abavela kuwona wonke amagatsha enyunyana baphumuze inqondo.
Utshele leliphephandaba ukuthi basebenza kanzima othisha ezikoleni bengabheke mihlomulo eyengeziwe kuhulumeni.
“Othisha bayazinikela emsebenzini yabo.
Sikubonile lokho ngemiphumela emihle abayikhiqizile kumatikuletsheni ekilasini lanyakenye.
Ngakho-ke kulesi sikhashana sithe asihlele imidlalo ukuze bezojabula bakhohlwe incindezi yomsebenzi nezimpi ezikhona emsebenzini esiqashelwe ukuwenza emnyangweni,” kusho uMnu Malinga.
Kule nyunyana kuke kwaba nomsindo ezinhlakeni zokuxhumana emuva kokhetho lobuholi bayo njengoba kwaguquka amatafula engqungqutheleni kwabakhona abakhala ngaphansi ababebhekiwe ukuthi bazongena ehhovisi.
