UGXEKE ubudedengu bokungavikelwa komnotho wesiFunda uMkhanyakude “ofudukiselwa kwezinye izindawo” uMnu Sbonelo Mathenjwa, ethula iqembu lakhe ngoMgqibelo eTiger Lodge, eJozini.
Leli qembu elisha elibizwa ngeJozini Congress, ligunyazwe ukungenela ukhetho eMkhanyakude kuphela.
UMathenjwa uthe usungule leli qembu ngoba efuna ukuba namandla okubhekana-ngqo nezidingo zomphakathi waseMkhanyakude. Leli qembu ulisungule ngokubambisana nengxenye yamakhansela aseJozini.
Uthe kalikho iqembu lezombusazwe abafuna ukuqeda ngalo. UMathenjwa ungusomabhizinisi obuye abe yikhansela laku-ward 2. Wangenela ukhetho ngokuzimela.
“Okwamanje akukho muntu osixhasile ngemali yokwenza imisebenzi. Mina imisebenzi yami iyazikhulumela. Leli yiqembu elisungulelwe abantu baseMkhanyakude futhi lisungulelwe ukuxazulula izinkinga ezibhekene nabantu bakulesi sifunda.
“Kuzwisa ubuhlungu ukuthi uMkhanyakude ucebile ngezokuvakasha nezolimo, kodwa abantu bakhona kabahlomuli lutho. Kufika abantu nakwezinye izindawo bezothatha imali, bahambe nayo,” esho.
Uqhube wathi bafuna ukuqeda ngokuqashwa ngokwenzelela komasipala nasezikhungweni zikahulumeni.
“Eminyakeni eyedlule bekujutshwa abantu eLuthuli House eGauteng, ukuba bezosebenza lapha eMkhanyakude. Kumanje sibhekene nenye futhi inkinga, abantu baqashwa oLundi maqede bazofakwa komasipala baseMkhanyakude.
“Siyiqembu elisungulelwe ukubhekana nanempi yobugebengu obudla lubi ezindaweni ezahlukene zaseMkhanyakude. Sinethemba lokuthi sizokwenza kancono ngokwemiphumela yokhetho lohulumeni basekhaya oluzobanjwa ngonyaka ozayo,” kuphetha uMathenjwa.
