IGauteng neKwaZulu-Natal yizona zifundazwe ezihamba phambili ngokwezibalo zokufa kwabantu. Lokhu kuvele embikweni wakamuva we-Stats SA, wocwaningo mayelana nokufa kwabantu ngo-2022.
Kulo mbiko kuvela ukuthi isibalo esiqoshiwe eMnyangweni wezaseKhaya, sabantu abashonile ngo-2022, siwu-486 041. Lesi sibalo se-hlile uma kuqhathaniswa nesango-2021 lapho kwaqoshwa khona u-620 394.
Kukholakala ukuthi ukwehla kwalesi sibalo kungenxa yokudamba kobhubhane iCovid-19. Ingxenye enkulu yalesi sibalo sabashone ngo-2022, kubikwa ukuthi ngabantu abadala abaphakathi kweminyaka ewu-65 kuya ku-69 (41 760); kulandele abaneminyaka ephakathi kuka-60 kuya ku-64 (40 774); kube ngabaneminyaka epha-kathi kuka-70 kuya ku-74 (40 340).
Abaneminyaka ephakathi kweyisihlanu kuya kweyisishiyagalolunye yibona abayingcosana esibalweni sabashone ngo-2022 (2 700). Ngokobulili, ocwaningweni kutholakale ukuthi lenyukile izinga labesilisa abashonile ngo-2022 uma kuqhathaniswa nango-2021.
Ngakolunye uhlangothi sehlile isibalo sabesifazane abashonile ngo-2022 uma kuqhathaniswa nango-2021.
Abantu abamnyama yibona abanesibalo esiphezulu sabashonile ngo-2022, kanti veleke yibona abaningi kakhulu ezweni. Babalelwa ku-335 049 abamnyama abashonile.
Kulandela abamhlophe ngo-46 204; kuze amaKhaladi ngesibalo esiwu-37 137, bese kuba ngamaNdiya-37 137. Nokho kunengxenye yabantu ababalelwa ku-55 346 okungacacisiwe ukuthi bangobaluphi uhlanga.
Ingxenye enkulu yalaba bantu abashonile kubikwa ukuthi ishone eGauteng, kulandele iKwaZulu-Natal, ne-Eastern Cape. INorthern Cape yiyona esinesibalo esincane kakhulu sabashone ngo-2022.
