BASEMKHANKASWENI wokunqoba ngamaqhinga abo abafundi abasungule irobhoti eliyisikebhe, elikhuculula udoti emanzini olwandle.
Abafundi base-Adams College, eThekwini, uSnazo Mtshali (16) no-Elihle Msomi (16), abenza uGrade 11 kulesi sikole, bayomela iNingizimu Afrika, eSweden, kuyona le nyanga, emncintiswaneni obizwa ngeStockholm Junior Water Prize.
Lo mncintiswano uqalwe nyakenye wuMnyango wezaManzi nokuKhucululwa kweNdle kuzwelonke. Uqale emazingeni ezifunda, kwaqokwa abahambe phambili, kwabe sekulandelwa ngokuqhudelwana ngokwezifundazwe.
Abafundi base-Adams badle umhlanganiso, sekuncintisana izifundazwe.
USnazo Mtshali uthi bekungelula ukwakha irobhothi elihamba emanzini, kodwa ngenxa yokuthi bazimisele kakhulu ezincwadi zabo, njengoba isikole sabo sigxile kakhulu kwisayensi nobuchwepheshe,bakwazile ukufezekisa isifiso sabo sokufika ezingeni likazwelonke.
“Basilekelelile kakhulu othisha ngesikhathi siqala lo msebenzi. Umnyango wezamanzi nawo usisizile njengoba sisesigabeni sokuya eSweden, kwazise njengamanje sesiyomela iNingizimu Afrika,” esho.
Uthi ngesikhathi uqalwa umncintiswano, ububizwa ngeSouthern African Youth Water Prize. Uthi bazolifulathela elakuleli mhla ka-22 kwephezulu, babuye mhla ka-29 kuyona le nyanga.
“Siyavotelwa kulo mncintiswano, kodwa kuvotwa online,” esho.
Uthi leli robhoti liqoqa udoti phansi emanzini ukuze kuvikeleke izilwanyana ezihlala khona, nendlela yokuveza ukuhlanza amanzi uma usuqoqekile udoti. Uthi konke lokhu bakwenze ngamasu obuchwepheshe.
“Lo mncintiswano ukhuthaza kakhulu intsha ukuba iqhamuke namasu okuxazulula izinkinga zamanzi,” kusho uSnazo.
Ngesikhathi benqobe ezingeni lesifundazwe, bahlomule u-R6 000 nemifundaze ezobafundisa emanyuvesi akuleli uma sebephothule umatikuletsheni. Ezingeni likazwelonke bahlomule u-R15 000, no-R10 000 umuntu ngamunye, obhekelela uhambo
lwabo, namathikithi ohambo. Phesheya kubekwe umklomelo wemali enkulu.
Ukuvotela laba bafundi, ungena kule link: https://stockholmwaterfouncation.org/stockholm-junior-water-price/community/vote/#slide12827
