KWALE kancane kuqopheke umlando womdlalo wamanqamu wamakilabhu aseNingizimu Afrika kwiCaf Champions League, i-Orlando Pirates iphunyula inyamazane isiyibambile. IBucs idliwe yiPyramids ngo-3-2 emlenzeni wesibili weSemi-final izolo ngoLwesihlanu ebusuku ekuhambeni eGibhithe.
Emdlalweni owandulele lona, iMamelodi Sundowns ivunywe yizinyanya ibambana ngo-1-1 ne-Al Ahly, khona eGibhithe, okuyenze yadlulela kowamanqamu ngomthetho wegoli lasekuhambeni.
Imidlalo yemilenze yokuqala, egijinywe kuleli ngempelasonto edlule, yomibili iphele zibambeni ngo-0-0.
Kuze kwaba Kabili eziMnyama zihamba phambili eGibhithe, obese kusho ukuthi iPyramids kumele ishaye amagoli amabili ukuze inqobe.
URelebohile Mofokeng noMohau Nkota beBucs bakhombise ukuvuthwa beshayela ezabo amagoli, kodwa izitobha zabo zabenzela phansi, zehluleka wukuvala ngendlela emuva.
Emdlalweni weDowns, kusize Umkhonto ogwaze ekhaya sekusele amanenjana umdlalo uphele, umdlalo waphela ngo-1-1, njengoba osokhaya bebehamba phambili ngo-1-0.
Sekulotshiwe ukuthi umdlalo wamanqamu weChampions League uzogijinywa yiSundowns nePyramids ngomhla ka-24 kuNhlaba eNingizimu Afrika, nangomhla ka-1 kuNhlangulana eGibhithe.
