LISEQHULWINI igama lentandokazi kamaskandi uLimit ezingxoxweni zabaculi abazonandisa kwindumezulu yomcimbi, obhekwe ngabomvu kulo nyaka, iGagasi FM Beach Fest.
ILANGA lithole ngabasondelene nalo msakazo ukuthi lo msakazo ubheke ukuthi uqashe lo mculi ukuba ayomela umaskandi kulo mcimbi ovamise ukuheha izinkulungwane zabantu, ozokuba ePeople’s Park, eMoses Mabhida Stadium, eThekwini.
Umcimbi walo nyaka usuqalile ukuba sematheni abathandi benjabulo, njengoba lo msakazo usumemezele ukuthi uzokuba ngomhla ka-6 kuZibandlela (December), waphinde waveza nohlu olungakapheleli, okukhona kulona izinkakha ze-kwaito, uMdu Masilela neTrompies, njengabanye abazojabulisa abantu.
Leli phephandaba lihabule ukuthi ziyaqhubeka izingxoxo nabanye abazonandisa kulo mcimbi, okubalwa kubona noLimit, ongomunye wabaculi bakamaskandi abangaconsi phansi kulezi zinsuku. Omunye igama lakhe elike laphakanyiswa nguMafikizolo, onengoma eshisa izikhotha, esihloko sithi, “Uyoncengwa Unyoko”.
Kuzokhumbuleka ukuthi unyaka nonyaka lo mcimbi uvamise ukuba nomculi oyedwa kamaskandi. Phambilini kuke kwabonakala uNtencane, kwaba nguKhuzani, kanti ngonyaka odlule kubonakale uMthandeni SK.
Ethintwa uKhulekani Shandu, okhulumela iGagasi uthe kalukaphothulwa uhlu lwabaculi abazonandisa.
“Sizolokhu sibaveza abaculi esesiziphothulile izingxoxo nabo, njengoba bekhona esesibavezile,” kusho uShandu.
Uvumile ukuthi uLimit ungo-munye wabaculi abasabambe izingxoxo nabo. Uthembise ukuthi bazolukhipha uhlu oluphelele lwabaculi ngokuhamba kwesikhathi, kodwa okwamanje basafuna abantu babambe usuku, ukuze bazilungiselele. lucky.cain@ilanganews.co.za
