KULINDELEKE ukuba kuthele izithelo ezinhle ukusayinwa kwesivumelwano sokusebenzisana phakathi kweminyango emithathu eholwa ngongqongqoshe abehlukene KwaZulu-Natal.
Namuhla ngoLwesibili uMnyango wezeMisebenzi yoMphakathi oholwa nguMnu Martin Meyer, owezoLimo nokuThuthukiswa koMphakathi oholwa nguNkk Thembeni kaMadlopha-Mthethwa nowezokuThuthukiswa koMnotho, ezokuVakasha noKongiwa kweMvelo, oholwa nguMfu Musa Zondi, basayine isivumelwano sokusebenza ngokubambisana ezingxenyeni ezinkulu zokusebenza kwabo kwansuku-zonke.
Abaholi bale miyango bahlangane eCoastlands Hotel eThekwini. Ngaphambi kokusayina, kuqale ngokuthi uMeyer amemezele ukuthi kunamapulazi awu-11 azonikezelwa kule minyango ngenhloso yokuba asentshenziswe ukuze kuthuthukiswe imiphakathi ehlala eduze kwayo.
Iningi lalawa mapulazi lingaphansi kwesiFunda uMzinyathi. Ukusayinwa kwalesi sivumelwano kuzokwenza ukuthi umphakathi ukwazi ukusebenza umhlaba, futhi kube lula ukuthola izinsiza zikahulumeni.
UMeyer uthe banethemba lokuthi kuzothela izithelo ezinhle ukusayinwa kwalesi sivumelwano.
“Thina siphethe umhlaba nezakhiwo. Umnyango wezoLimo uphethe izinsiza-kusebenza ezidingwa ngabantu. Umnyango wezokuThuthukiswa koMnotho wona uphethe imali nezidingo okufanele zisentshenziselwe ukuthuthukisa imiphakathi,” kusho uMeyer.
UNkk Madlopha-Mthethwa uthe okukhulu kakhulu wukuthi babheke kakhulu umhlaba osezindaweni zasemakhaya.
“Kuyinto eyaziwayo ukuthi umhlaba osezindaweni zamakhosi kawuthengiswa futhi kuyicala ukuwuthengisa ngoba ungaphansi kweNgonyama Trust. Okwethu sizogada ukuthi ukuthi kabekho yini abathola ithuba lokugila imikhuba emuva kokuba sekubuyiswe la mapulazi. Sizibophezele ekutheni kufanele siwuthuthukise umhlaba esivumelene ukuthi sizowusebenza ndawonye,”kusho uMadlopha-Mthethwa.
