SIZOPHUMA namuhla ngoLwesithathu isinqumo odabeni lokushicilelwa kwemiphumela kaMatric ka-2024 emaphephandabeni.
Izolo ngoLwesithathu iNkantolo eNkulu yasePitoli isigodlile isinqumo kulolu daba oluphuthumayo olufakwe yinhlangano i-Information Regulator (IR), ifuna ukuba le nkantolo iphoqe uMnyango weMfundo eyisiSekelo ukuba ungayishicileli imiphumela emaphephandabeni.
I-IR ikholwa ukuthi ukushicilelwa kwayo kuwukwephula imigomo yokumthetho wokuvikelwa kwemininingwane yomuntu, iPopia.
Ngaphambi kokuthi kulalelwe izethulo zabameli, ijaji uNkk Ronel Tolmay lifanise leli cala nelika-2022 lapho ijaji uMnu Anthony Millar lanquma ukuthi umnyango uyishicilele imiphumela, kodwa usebenzise izinombo zokuhlolwa kwabafundi. UTolmay ube esebuza ukuthi isicelo esifakwe kulo nyaka sehluke ngani kunesika-2022.
Ummeli we-IR utshele inkantolo ukuthi umehluko wukuthi ngo-2022 ijaji kalizange licubungule kahle. Uthi kuwukuphulwa iPopia ukuba kushicilelwe imiphumela ngale kwemvume ebhaliwe yabafundi nabazali babo.
UMnu Marius Oosthuizen ucele inkantolo ukuba isichithe isicelo se-IR ngoba beyinesikhathi sonke sokuzwakalisa izikhalo zayo kusuka kuphume isinqumo ngo-2022.
Utshele inkantolo ukuthi ukungaguqulwa kwesinqumo sikaMillar kule minyaka eyedlule kugunyaza umnyango ukuba ukwazi ukusebenza ngaso. I-Afriforum nayo yenze izethulo zayo ivumelana nomnyango kwelokuqhubeka nokushicilelwa kwemiphumela emaphephandabeni.
