“IMPI yokuqeda ubugebengu iyonqotshwa kuphela uma zonke izinhlaka ezithintekayo, okubalwa kuzona umphakathi, abamabhizini nohulumeni, zibambisana.”
Lawa ngamazwi ashiwo nguMengameli Cyril Ramaphosa namuhla ngoLwesibili ngesikhathi evula ingqunquthela yamaphoyisa lapho ehlangene khona e-Emperors Palace Convention Centre, eGoli.
Kule ngqungquthela yezinsuku ezintathu, kudingidwa ngezindlela amaphoyisa ophiko lweSouth African Police Service (Saps) angazisebenzisa ukwehlisa izinga logubegengu eliphezulu eNingizimu Afrika.
URamaphosa unxuse ukuba kuvuselelwe ubudlelwano phakathi kwamalungu omphakathi namaphoyisa.
“Esikhathini esiningi uma kwenzeka izigameko zobugebengu, uma ubuzisisa kahle kubantu bakuleyo ndawo, uzothola ukuthi bayazi ukuthi ngubani owenze lokho, yize kuyinto esuke ikhulunyelwa phansi.
“Ngakho-ke uma umphakathi unobudlelwano obuhle namaphoyisa futhi uwethemba, linganqadwa izinga lobugebengu,” esho.
Unxuse ukuba kule ngqungquthela kungabhekwa kuphela ukuthi kuliwa kanjani nobugebengu, kodwa kubhekisiwe nomsuka wobugebengu.
Ubonge uNgqongqoshe wamaPhoyisa uMnu Senzo Mchunu ngokuqhamuka nombono wale ngqungquthela, wathi unethemba lokuthi iyigxathu elibalulekile ekulweni nobugebengu.
Uthe uhulumeni kawukwazi ukungayixazulile indaba yobugebengu ngoba inomthelela omubi emnothweni wezwe njengoba yakha isithombe esibi nakubatshalimali.
