INTATHELI YELANGA
ISIKHULU seGomora United yaseGauteng – enyukele kwiMotsepe Foundation Championship (MFC) emuva kokuba yizigqwele emidlalweni yokuhlunga ye-ABC Motsepe League, ebikule nyanga – uJoe Seanego, siveza esikwethenjiswe yisitobha sale kilabhu, uRooi Mahamutsa ngaphambi kokuba siphanyeke amakhokho emgibeni. IGomora inyukele kwiMFC neThe Bees FC yaseMpumalanga, neMidlands Wanderers yaKwaZulu-Natal.
UMahamutsa owazakhela udumo eyibamba noLucky Lekgwathi emuva kwi-Orlando Pirates, uzokuba neminyaka ewu-44 ubudala ngo-October.
NGU-ROOI Mahamutsa (okwesobunxele) osazohlala kwiGomora United. ISITHOMBE NGABE: BACKPAGEPIX
USeanego uthe: “Akayi ndawo uRooi. Wangithembisa ukuthi uzongifaka kwiPSL (Betway Premiership) bese ethatha umhlalaphansi.”
UMahamutsa uzokuba ngumdlali omdala kunabo bonke abagijima kwiMFC, ephula irekhodi lika-Atisang Batsi (42) we-Orbit College enyukele kwiBetway Premiership emuva kokuba yizingqwele zemidlalo yokuhlunga. Kule midlalo ibibhekene neCasric Stars neCape Town City – edliwe yizembe esigabeni esikhulu.
Ngaphandle kukaMahamutsa, uSeanego uthi nomqeqeshi wale kilabhu, uJohnny Ferreira uzoqhubeka nomsebenzi wakhe nethimba lakhe, okukhona kulo noPatrick Phungwayo oyisekela-mqeqeshi. Naye uPhungwayo wake wagijima kwiPirates.
