OWAYENGUMHOLI weMK Party eMpumalanga uMary Phadi uveze ukuthi ufuna kumiswe iPhini likaMengameli waleli qembu uDkt John Hlophe ngezinsolo zokunukubeza ngokocansi.
Ngokubika kweTimesLive encwadini esabalele ezinkundleni zokuxhumana uPhadi usola uHlophe ngokuzidlisa santshanyana kuyena emfuna ucansi. Kule ncwadi uPhadi uveza ukuthi njengowesifazane uyahlukunyezwa njengoba ayichitha imizamo kaHlophe ngesikhathi efuna ukuchitha ubusuku naye.
Ngesikhathi ekhuluma nabezindaba beNewzroom Afrika uPhadi uveze ukuthi uzimisele ukulifaka enkantolo lolu daba.
Uthe ubona kuzosiza abesifazane abaning ababhekene nezinkinga zokufunwa ucansi ezindaweni abasebenza kuzona.
Uthe abesifazane kube bakwazi ukuphumela obala bakhulume uma behlangabezane nezimo ezifuze lezi.
Kubikwa ukuthi uPhadi wahlangabezana nalesi sigameko ngemuva komhlangano wobuholi ngomhla ka-4 kuNcwaba 2024 owabe useMbombela.
UPhadi uthe ufuna uHlophe amiswe ngokushesha esikhundleni sakhe kuleli qembu.
Uqhube ngokuthi akazimisele ukuzama ukwenza abantu bamkholwe ngalolu daba njegoba iqiniso lisobala futhi bukhona nobufakazi bemiyalezo bezinsolo azithwesa uHlophe.
