AKUPHUMANGA lutho kusha umuzi wesishoshovu somkhankaso olwisana nokuhlala kwabantu bokufika kuleli abangenazo izimvume, uNgizwe Mchunu, oseMbumbulu.
Ngokuthola kweLANGA, ngeSonto kufike izinsizwa ezintathu emzini kaNgizwe, zafica izingane, zabuza ukuthi ukhona yini. Kuthe uma zitshelwa ukuthi akekho, zahamba. Emuva kwalokho kubonakale sekusha izindlu. UNgizwe utshele ILANGA ukuthi lesi sehlakalo sivale ngehlahla.
“Ngilimele, kushe yonke into, kakusalanga lutho,” kusho uNgizwe.
Uthi kwenzeke isigameko eseGoli, kanti inkosikazi yakhe ibiseCape Town. Ebuzwa ukuthi zikhona yini akusolayo ukuthi yikhona okuholele kulesi isigameko, uthe kunzima ukuqagula.
“Ngiyaqala empilweni yami ukwehlelwa yisehlo esifana nalesi,” esho.
Abantu abaningi ezinkundleni zokuxhumana, bahlobanisa lesi isigameko nemibhikisho yokuxosha abantu bokufika kuleli. Lo muzi ungomunye wemizi kaNgizwe eseThekwini ohlala umfazi omdala uMaNxumalo.
