UNXUSE ukuba kuvunguze umoya wobunye nokuzwana kumalungu eqembu lakhe ngaphansi kwesiyingi saseJozini umongameli we-IFP uMnu Velenkosini Hlabisa. UMnu Hlabisa ubethula inkulumo enkonzweni yomngcwabo kaMnu Mzwandile Dlamini (36) obengunobhala we-IFPYB eMkhanyakude.
UDlamini udlule emhlabeni emuva kokungeniswa esibhedlela exinwe wukugula izinsukwana. Umufi ubengumqondisi kwelinye lamahhovisi omkhandlu kamasipala waseJozini.
UHlabisa ubehambisana nabaholi baleli bandla ezingeni likazwelonke, isifundazwe iKwaZulu-Natal kanye nasemagatsheni. Inkonzo yaomngcwabo ibibanjelwe enkundleni yezemidlalo eMamfene, eJozini. Leli qembu liqhube inkonzo ngokubambisana nebandla lamaNazaretha elidume ngokuthi elakwaShembe okuyibandla abekhonza kulona umufi.
Uhlelo lwenkonzo beluphethwe nguMnu Sthembiso Simamane ongomunye wabaholi baleli qembu eJozini kanye noMnu Xolani Ngwezi oyimeya yaseMhlathuze.
UHlabisa uthe uyazi ukuthi kunezinkulumo nokwehlukana kwemibono kumalungu aleli qembu ngaphansi kwesiyingi iJozini. “Ngicela sisebenzise lolu suku lukaMzwandile njengensika yokubuyisana nibe munye. Ngiyajabula nangokubona izinsiza zeNkatha lapha eJozini. Ngiyazi ukuthi kubuye kube nalezo zinto kodwa ngiyanxusa ukuba nibe munye. Ngilapha ngoba ngiyalazi iqiniso likaMzwandile. Angikungabazi ukuthi besizoba naye kwaNzimela, eMelmoth emkhulekweni wokubungaza ukusungulwa kweqembu. Olundi besizoba naye ngeSonto sizobungaza. Siyeza eNgwavuma sizobonga amagalelo eNkosi Mangosuthu Buthelezi owavikela iNgwavuma sekuthengiswe ngayo,” kuphetha uHlabisa.
