UZOBUYELA enkantolo ngesonto elizayo umlisa waseZimbabwe, obanjwe eNingizimu Afrika, ofunwa eNgilandi ngezinsolo zokubulala umkakhe namadodakazi abo amabili.
UMnu Ndodaba Tshuma (45) uvele kafushane eNkantolo yeMantshi yaseGoli namuhla ngoMsombuluko ngecala lokutholakala nesibhamu esingekho emthethweni, okusolakala ukuthi ubefuna ukuzibulala ngaso. Lo mlisa uboshwe ngamaphoyisa ngamaphoyisa ngoLwesihlanu.
Ngokusho komkhulumeli wamaphoyisa kuzwelonke uBrig Athlenda Mathe, basebenzisana nophiko oluphenya ubugebengu emhlabeni i-Interpol, ukuthola ukuthi uTshuma ufike kanjani eNingizimu Afrika, nokuthi kukhona yini abamsizile ukubalekela ingalo yomthetho.
Ukuboshwa kwalo mlisa sekwenyuse izinhloze ezishoshovini zezokuphepha mayelana nokusebenza komthetho emingceleni yezwe, okwenza kugcine kungena nezigebengu eziyingozi, okubeka engcupheni impilo yezakhamizi.
Ngokusho kwamaphoyisa, uTshuma ufike eNingizimu Afrika ngomhla ka-5 July. Kuthiwa ubenamanye amalungu omndeni wakhe ngesikhathi eboshwa.
