INTATHELI YELANGA
UCELA uxolo emndenini wakhe, kubalandeli nakubangani bakhe uKgaogelo Sekgota (27) ogqame egijima kwiKaizer Chiefs, ngokulingeka agcine esesebenzisa izidakamizwa.
Lo mdlali owake wagijima nakwiMoroka Swallows engasekho, nakwiStellenbosch FC, ugcine ukukhahlela ibhola esemabhukwini e-Upington City edlala kwiMotsepe Foundation Championship (MFC), kanti kuthiwa angase aphume noma yinini esikhungweni sokuhlumelelisa izimilo, iHope of Achievers Rehabilitaion Centre, esisePolokwane, lapho athola khona usizo. Usenezinyanga ezine ekulesi sikhungo.
Ngokubika kweSundayworld, uSekgota uvumile ukuthi imikhuba yakhe yangaphandle kwenkundla ibalimazile abasondelene naye.
“Ngiyaxolisa kakhulu kubalandeli bami, umndeni nabangani bami ngokubenzela phansi ngokuvumela ukwehlulwa yizidakamizwa. Kube yisikhathi esibi kakhulu empilweni yami, kodwa-ke ngiyajabula ngokuthola ithuba lesibili,” esho.
Uthi udlule ngaphansi kwezinhlelo ezahlukene ngesikhathi ehlunyeleliswa isimilo, emuva kwazo, kwatholakala ukuthi “usezelwe kabusha”, futhi useqatha ngokwanele ukubuyela enkundleni.
Umnikazi wesikhungo okugcinwe kusona uSekgota, uWatson Luandi, ukuqinisekisile ukuthi lo mdlali “uselehlulile idimoni”.
Uma ephuma lapha uSekgota, uzobe elandela uLerato Chabangu wodumo kwiMameldoi Sundowns neBafana Bafana, naye obekulesi sikhungo, waphuma ngomhla ka-14 kuNcwaba (August). UChabangu ubenenkinga yokuphuza eqise, kanti uSekgota yena, phambilini kuvele ukuthi ubehlulwa wumthunzi wezinkukhu.
