UVULE ngewini eqala ukugijima eNingizimu Afrika uDaisilah Jerono waseKenya edla umhlanganiso kwiTotalsports Women’s Race (TWR) yaseCape Town ngeSonto ngesikhathi esiwu-31:29.
Indawo yesibili ithathwe nguzakwabo uFaith Cherono owenze isikhathi esiwu-31:32 kwathi ingqwele yaseThekwini yeTWR uNeheng Khatala waseLesotho yangena isithathu, ngesikhathi esiwu-33:23.
Lo mjaho okungoweibili kwemithathu ubungenelwe ngabasubathi abawu-10 000. Umjaho wokugcina weTWR uzokuba ngeSonto elizayo eGoli. UDaisilah unqoba lo mjaho nje, ukleliswe kunombolo 7 emhlabeni kwi-21.1km ngesikhathi esiwu-1:05:21.
Ekhuluma nabezindaba ngemuva komjaho uthe: “Umjaho ubunzima kakhulu kubhilite nomoya. Ubunyuka uphinde wehle kodwa ngijabule ngokunqoba. Bengingakulindele ukunqoba. Bengizozihlola ukuthi ngiqatha kangakanani. Ngijabule nangendlela izibukeli ebezisijabulela ngayo emzileni,”
UMichael Meyer wakwaStillwater Sports esabalalisa lo mjaho uthe bayambongela uDaisilah ngokunqoba. Uthe abasubathi abebemamemile kwiTWR yanonyaka benze kahle kakhulu. Uthi kubajabulisile ukubona izinkulungwane zabasubathi besifazane zibungaza usuku lwabo ngokugijima.
Imiphumela yalo mjaho ihambe kanje, esigabeni esivulelekile:
1.Daisilah Jerono (Kenya) 31:29,
2.Faith Cherono (Kenya) 31:23,
3.Neheng Khatala (Lesotho) 33:23,
4.Olga Firsova (Australia) 36:20,
5.Marie-Tinka Olivier (South Africa) 37:25,
6.Nicole van Wyk (South Africa) 37:43,
7.Deanne Laubscher (South Africa) 38:07,
8.Lauren Jonathan (South Africa) 38:18,
9.Yandiswa Shange 38:39,
10.Mia Steytler (South Africa) 38:49.
