SEKUQINISEKISIWE ukuthi sebevulelwe amakhawunti ebhange iFNB abahola imali yezibonelelo zikahulumeni, abangamakhasimende ebhange Ithala elisabhekene nenkinga.
Okhulumela iFNB, uNkk Sizwekazi Mdingi, ukuqinisekisile ukuthi leli bhange linxuswe wuMnyango wezeMali kuzwelonke ukuba lilekelele ngokuvulela ama-akhawunti labo abebehola ebhange Ithala izibonelelo zikahulumeni ezikhokhwa yiSASSA.
Ukuthuthwa kwalawa makhasimende eThala ahola izibonelelo zikahulumeni kulandela ukuba iPrudential Authority (PA) ifake isicelo esiphuthumayo eNkantolo eNkulu eMgungundlovu, okulindeleke ukuba silalelwe ngoLwesine, lapho ifuna ukuba inkantolo igunyaze ukuba kuvalwe ibhange Ithala. Emuva kokuba iPA ithathe lesi sinyathelo, kumiswe ukusebenza kwama-akhawunti amakhasimende aseThala, okubalwa kuwo nawalabo abahola lezi zibonelelo ezahlukene.
UNkk Mdingi uthi-ke sebewavulile ama-akhawunti alabo bantu ukuze iSASSA ikwazi ukufaka kuwo imali yezibonelelo. Uqhube wathi inhloso yabo enkulu beyiFNB wukuqikelela ukuba abantu baqhubeke bathole umholo wabo wezibonelelo.
Ngakolunye uhlangothi iSASSA iqinisekisile ukuthi isebenzisana neFNB ukuvulela ama-akhawunti abantu abahola izibonelelo eThala, abebengakawavuli ama-akhawunti kwamanye amabhange emuva kokuvaleka kwawaseThala. I-SASSA ithi okwamanye labo bantu bazothola umholo wabo eFNB kuze kube bahlinzeka iSASSA ngemininingwane yamabhange abazikhethele wona abazohola kuwo.
Kubikwa ukuthi abantu bangahamba bayolanda amakhadi abo aseFNB emagatsheni aleli bhange aseduze nabo, kusukela namhlanje ngoLwesibili kuze kube wuLwesibili oluzayo mhla ka-4.
NgoLwesine ILANGA lizoshicilela udaba olugcwele oluqukethe yonke imininingwane ngalesi sinqumo.
