IKOMIDI eliyisipesheli lasePhalamende, eliphenya ngokungenelela kosopolitiki emsebenzini wezinhlaka zomthetho, selikhiphe uhlu nezinsuku, okuzovela ngazo abazofakaza. Umholi wabafakaza ekomidini, u-Advocate Norman Arendse, uthi namhlanje ngoLwesibili, nakusasa ngoLwesithathu, kuzovele owayeyiNhloko ye-Independent Police Investigative Unit (IPID), uRobert McBride.
Lolu phiko, yilona okubikwa kulo amaphoyisa angenzi umsebenzi ngendlela elindelekile nefanele. IPhini leNhloko yamaphoyisa kaMasipala waseKurhuleni esamisiwe, uBrig Julius Mkhwanazi, uzokwethula ubufakazi bayo ekomidini ngoLwesine, nangoLwesihlanu.
Uchwepheshe emkhakheni wezokuphenya, uMnu Paul O’Sullivan, nosomabhizinisi waseNorth West uMnu Brown Mogotsi, bazofakaza ngesonto elizayo. UMnu O’ Sullivan, ufuna uJenene Nhlanhla Mkhwanazi, ageze igama lakhe ngoR10 million. Uthi izinsolo ezenziwa nguMkhwanazi, ezithinta igama lakhe zakhinyabeza ukusebenza kwebhizinisi lakhe lezokuphepha.
UJenene Mkhwanazi, ngoNtulikazi wangonyaka odlule esithangamini sabezindaba, ayesibize eThekwini wathi uMnu O’ Sullivan, ngomunye wabantu abagxambukela ekusebenzeni kwamaphoyisa singekho isidingo.
Uthi lokhu kube nomthelela ekuhlakazweni kwePolitical Killings Task Team (PKTT). UMkhwanazi naye wayethe ufuna u-O’Sullivan, amhlawule ngo R5 million, njengoba amhlambalaza. Ukulalelwa kubufakazi yiKomidi lasePhalamende, umnqamulajuqu wakho ungomhlaka 20 kuNhlolanja (February), walo nyaka.
menzi.jele@ilanganews.co.za.
