SELIPHINDE lavuka icala lokuthunaza isithunzi somuntu, elavulelwa iMeya kaMasipala uMhlathuze, uMnu Xolani Ngwezi.
Lokhu kuqinisekiswe yincwadi yeNational Prosecuting Authority (NPA) egunyaza ukuba ashushiswe uNgwezi ngaleli cala. UNgwezi uzovela eNkantolo yaseRichards Bay ngomhla ka-3 kuMfumfu (October).
Ezinyangeni ezimbili ezedlule, uNgwezi ubesematheni ngesikhathi kusabalala ezinkundleni zokuxhumana imibiko yokuthi uboshiwe ngecala lokwehlisa isithunzi. Nokho uMasipala uMhlathuze wayichitha leyo mibiko, wathi ingamanga aluhlaza.
Umasipala waveza ukuthi uNgwezi waziyela yena emaphoyiseni, emuva kokuzwa ukuthi kunecala lokuthunaza isithunzi avulelwe lona.
Kwakufanele avele okokuqala enkantolo ngomhla ka-24 kuNhlangulana (June), kodwa wangabe esavela ngenxa yokuthi iNPA ngaleso sikhathi, yenqaba ukumshushisa ngesizathu sokuthi icala lalingenabufakazi obubambekayo.
Icala abhekene nalo lavulwa ngusomabhizinisi uMnu Cyril Paton, onenkampani yezokuphepha. Phambilini umasipala wathi uNgwezi uboshelwe amanqina enyathi, okwenzekayo kuyimizamo yepolitiki yokudala ungabazane emphakathini ngobuholi bakhe.
Ngakolunye uhlangothi, uMnu Christo Botha, oyiSekela leMeya yena uzovela eNkantolo eRichards Bay, ngomhla ka-3 kuMandulo (September) nonyaka, lapho ezobhekana khona necala lokusabisa nelokwehlisa isithunzi.
