SEKUSELE kancane siphothulwe isigaba sokuqala sokulungiswa wendawo yokuheha izivakashi enomlando iMandela Capture Site eHowick maphakathi neKwaZulu Natal.
Lokhu kuvezwe isikhulu sesikhashana sohlaka lwezokuvakasha kulesi sifundazwe iKZN Television and Film Authority uMnu Sibusiso Gumbi ngesikhathi uNgqongqoshe woMnyango wezokuThuthukiswa koMnotho nezokuVakasha uMfu Musa Zondi ehambele kule ndawo ukuyohlola ibanga eselihanjiwe ukulungiswa kwale ndawo.
Echaza uGumbi uveze ukuthi sekusele kancane ukuba isigaba sokuqala esidle imali elinganiselwa ku-R12.5 million siphothulwe.
Isigaba sokuqala sokulungiswa kwale ndawo sihlanganisa isango lokungena kule ndawo, umgwaqo owakhiwe ngokusezingeni elifanele izisindo zamabhasi nezimoto zezivakashi kanjalo nendawo yokupaka.
UGumbi uthe balindele ukuthi lesi sigaba siphothulwe maphakathi noZibandlela.
Udalule ukuthi inkence yokulungiswa kwale ndawo kuqhamuka eMnyangweni wezokuVakasha ezweni lonke njengoba ukukhishwa kwayo kwaphasiswa ngo-2018.
UNkk Thuli Mtolo oyi-Operations Manager eMandela Capture Site utshele ILANGA ukuthi le ndawo isaqhubeka nokuheha izivakashi iningi lazo eziqhamuka kwamanye amazwe.
Uthe ngosuku bamukela cishe izivakashi ezilinganiselwa ku-120 no-150 ngosuku.
“Lesi sibalo asihlukile kakhulu kunaleso esingaphambi kwe-Covid 19 kodwa esesikuqaphelile wukuthi phambilini bekuvakasha kakhulu abakuleli kodwa muva nje sesithola izivakashi eziqhamuka phesheya kwezilwandle,” kusho uNkk Mtolo.
Uthe unethemba ngokulungiswa kwale ndawo nomgwaqo oza kuyona njengoba kuzokwenza sande isibalo sezivakashi abazamukelayo ngosuku.
Ukuhambela kukangqongqoshe kule ndawo kuyingxenye yokwethulwa ngokusemthethweni kwesizini yezokuvakasha njengoba kuqala amaholidi okuphela konyaka.
