IZANGOMA zezulu zakwaSouth African Weather Service sezisenyusele kuLevel 6 isexwayiso sezimvula ezinamandla ezingxenyeni eziseningizimu-mpumalanga yeKwaZulu-Natal.
Phambilini lesi sexwayiso besibekwe kuLevel 2. Kuthiwa lezi zimvula zidalwa wumsinga obandayo (cold front) okulindelwe ukuba ugadle kulesi sifudazwe. Kulindelwe izimvula ezinamandla namuhla ngoLwesithathu ntambama kuze kube wuLwesihlanu.
Izindawo okubhekwe ukuba zikhahlamezeke kakhulu yiseThekwini, KwaDukuza, eMkhambathini, eNdwedwe, eRay Nkonyeni, kuMasipala uMdoni, eMuziwabantu naseMzumbe.
Kwexwayiswa abantu ngokuthi lezi zimvula zingadala izikhukhula, ikakhulu ezindaweni eziyimijondolo nalezo eziseduze kwemifula. Kwexwayiswa nabashayeli ukucophelela emigwaqweni.
