SICHITHIWE isicelo senkampani yezikhali yaseFrance, iThales, kanye nowayenguMengameli wezwe uMnu Jacob Zuma, ebebefuna ukuba ahoxiswe amacala ababhekene nawo eNkantolo eNkulu eMgungundlovu.
IJaji uMnu Nkosinathi Chili ukhiphe isinqumo ngoLwesibili, wasichitha lesi sicelo seThales noZuma.
Le nkampani yafaka lesi sicelo ikhala ngokuthi ukuqhubeka kwecala ngeke kube nobulungiswa ngoba sebashona ofakazi bayo ababili abasemqoka, okunguMnu Pierre Moynot noMnu Alain Thetard, ababeyizikhulu kule nkampani.
UZuma ubefuna ukuthi uma icala leThales lihoxiswa, nelakhe lihoxiswe – wathi ngeke kwenzeke ukuba umbuso uqhubeke nokumshushisa uma ehoxiswa amacala eThales ngoba ngeke kube nobulungiswa.
IThales kanye noZuma babheke noxhaxha lwamacala abandakanya inkohlakalo, ukukhwabanisa nokushushumbiswa kwemali, athinta ithenda yezigidi yezikhali.
Leli cala kulindeleke ukuba libuyele enkantolo mhla ka-4 kuZibandlela (December) 2025, lapho kulindeleke ukuba abameli bavumelane ngezinsuku zokuqala kokuqulwa kwalo.
