UNGQONGQOSHE wezoLimo KwaZulu-Natal uNkk Thembeni Madlopha-Mthethwa uhlole umonakalo odalwe yizimvula ezinamandla ezindaweni ezahlukene ngaphansi kukaMasipala waseMkhanyakude.
Lo mholi ngoLwesithathu ube ehambisana neziphathimandla zemikhakha eyahlukene okubalwa kuzona nezikhulu zoMkhandlu wesiFunda uMkhanyakude noMasipala waseJozini.
Kusukela ngeSonto izulu belilokhu liyidliva, kwakhahlamezeka izindawo eziningi. EJozini kube nezindawo eziningana ezithintekile. Kwesinye isigameko, kube ngesowesifazane ophume ekhaya elibangise emasimini, okuthe engazelele wazithola esevaleleke esiqhingini, ngenxa yokungenisa komfula iNgwavuma.
NaseMkhuze izakhamizi zivalelekile njengoba izulu livale umgwaqo ngamanzi. Ungqongqoshe uthe kuzojutshwa ithimba elizohlola isimo, lihlanganise umbiko ngokudla okulimale emasimini.
“NgoLwesibili sizobamba umhlangano nezinhlaka ezithintekayo. Abalimi sizohlangana nabo, sibheke indlela eya phambili ukuze sigweme izingozi okungenzeka zibe khona ngenxa yamanzi.
“Sizobuye sibhunge nangodaba lwabantu abakha imizi ezindaweni ezinamanzi,” kuphetha uNkk Madlopha-Mthethwa.
