YETHEMBISA ukufuqa ngamandla izinhlelo zentuthuko yomphakathi ngaphandle kokubheka ibala lomuntu iMeya entsha kaMasipala waseJozini, egcotshwe namuhla ngoLwesihlanu.
UMnu Nkosinathi Myeni ongowokudabuka eMhlekazi, eMkhuze, uqokelwe kulesi sikhundla emhlanganweni wamakhansela obubanjelwe ehholo lomphakathi eMachibini. UMyeni uvale isikhala esivuleke ngemuva kokuba uMnu Mfananaye Mathe, obeteketiswa ngelokuthi uyinkosi yezimeya, efake incwadi yokwesula kulesi sikhundla.
Ukwesula kukaMathe kulandela isiphakamiso esenziwe yiqembu labo i-IFP, ethathe isinqumo sokuhlakaza ubuholi balo mkhandlu ngoba kunezikhalo zokungahambi kahle kwezinye zezinto. UMathe utshele ILANGA ukuthi ufinyelele kulesi sinqumo ngoba ehlonipha ubuholi nezinguquko.
UMyeni unesipiliyoni sokusebenza ngomphakathi njengoba eneminyaka ewu-14 eyikhansela eliphethe uWard 01, kuwona lo masipala. Uthe uzosebenza nazo zonke izinhlaka zomphakathi ngenhloso yokufuqa izinhlelo zentuthuko yomphakathi.
“Akukho okuningi engizokwenza futhi engikuthebisayo ngaphandle kokuthi ngizibophezele ekutheni ngibe yisithunywa okufanele sigijimele kuwona wonke amakhona omkhandlu. Ngizosebenza nawo wonke amakhansela esijutshwe nawo,” kusho uMyeni.
