UTHI akafuni ukuqhathaniswa noMbekezeli “TLB” Mbokazi – oyisilomo seBafana Bafana, odlala kwiChicago Fire, egijima kwiMajor Soccer League (MLS) yase-United States of America (USA) – uMbulelo “OJ” Mabizela, owazakhela udumo kwi-Orlando Pirates.
U-OJ – oyale iTLB ngokuthi ingalinge idakwe wudumo – uthe akafuni ukuziqhathanisa nayo ngoba badlale ngezikhathi ezahlukene, kodwa uyavuma ukuthi ingumdlali onekusasa eliqhakazile. UMbokazi njengoMabizela, bagqame kwiBucs, njengoba babengokaputeni bayo besebancane.
“Siyabona sonke ukuthi umfana uza kahle, futhi unekhono. Ikusasa liqhakazile, futhi ngikholwa wukuthi angazuza okukhulu kunami ebholeni. Engimeluleka ngakho, wukuthi kumele agade izindlela zakhe ngoba ibhola likuthatha likubeke ezingeni eliphezulu, lona futhi likugaklaze phansi.
“Kodwa lokho kuncike ekutheni wena uziphethe kanjani. Kumqoka ukuthi lo mfana azithobe, aqhubeke nokusebenza ngokuzikhandla, abheke nabantu abasondela eduze kwakhe njengoba ehanjelwa kahle yizinto,” kusho uMabizela ekhuluma neLANGA emcimbini weThe Legends Music Experience eMgungundlovu ngeledlule.
UMabizela uxwayisa iTLB nje, eminyakeni edlule – engakafiki ngisho eminyakeni ewu-25 ubudala – wazithola esegixatshezwa ngesikhundla sobukaputeni kwiPirates, wayinqobisa isicoco seligi. Akumangalisanga ukumbona ethathwa yiTottenham Hotspur edlala kwi-English Premier League.
Ukwehluleka wukuziphatha kwenza waxoshwa kule kilabhu yase- England, wagcina esengumantunta nendishi emakilabhini aseNorway nawaseNingizimu Afrika, okubalwa kuwona iMamelodi Sundowns, iBidvest Wits, iPlatinum Stars, iMpumalanga Black Aces, i-Ajax Cape Town, AmaZulu FC neRoyal Eagles.
