UBUHANJELWE yizimeya zomasipala baKwaZulu-Natal umcimbi wokugujwa kweminyaka ewu-50 kwasungulwa i-IFP, obubanjelwe eJabulani, eSoweto, eGauteng, ngoMgqibelo.
Amalungu aleli qembu abephume ngobuningi bawo. Ubuholi balo kusukela emazikweni kuyofika kobukazwelonke, bebukhona. Phakathi kwabaholi abebekhona, kubalwa uMengameli waleli qembu uMnu Velenkosini Hlabisa (osesithombeni), uSihlalo walo uMnu Blessed Gwala, nabanye.
Ethula inkulumo uHlabisa, unxuse amalungu aleli qembu nezakhamizi zakuleli, ukuba zingavoti ngokulandela izinhliziyo kodwa zibhekisise kahle abantu okufanele bazihole emuva kokhetho lohulumeni basekhaya oluzobanjwa ngonyaka ozayo.
“Okubalulekile wukulungiselela ukhetho lwangonyaka ozayo, lapho abantu bakuleli bazophuma ngobuningi babo, bayokhetha abantu abafuna ukuholwa yibo. Siyiqembu elizishaya isifuba ngokuthi kusukela lasungulwa, alikaze liye emuva, kunalokho selokhu laba khona liyizwi labantu. Sinxusa abantu bakuleli ukuba babhekisise kahle uhlobo lwabaholi ababadingayo, kungabi wukuthi bavotela noma ngubani nje, ngaphandle kokubheka imuva labo,” esho.
USihlalo waleli qembu eGauteng, uMnu Bonginkosi Dlamini, uthe ukugunjwa kweminyaka ewu-50 lasungulwa leli qembu, kumenza akhumbule emuva.
“Ngikhumbula unyaka ka-1976 kuyona le ndawo. Ngalowo nyaka kwafika uMntwana waKwaPhindangene, iNkosi uMangosuthu Buthelezi, ephethe ilambu lentuthuko yomuntu onsundu. Kusukela lapho kuze kube yinamuhla, leli qembu likhathalele ukuthuthukiswa kwabantu,” kusho uDlamini.
