MTHOBISI SITHOLE
KUTHIWA ubesolwa ngokuthakatha ngamalungu omndeni nomakhelwane, owesifazane odutshulwe wabulawa nomyeni wakhe oyinduna esizweni saseMachobeni, eNkandla ngoMsombuluko entathakusa.
Induna uMnu Mqiniseni Dlamuka nowakwakhe uNkk Lindiwe Dlamuka, uMaNgubane, kuthiwa bahlaselwe babulawa, belele emzini wabo. Kuthiwa izingane zabo – efunda uGrade 1 neyenza uGrade 4 – zisinde ngoba bezilele kwenye indlu. Umthombo weLANGA – olidonse ngendlebe ukuba lingawudaluli – uthe kunezinsolo eziqinile zokuthi ukubulawa kwabafi kuhlobene nezinsolo ebezilokhu zivela, zokuthi sebewuqedile umndeni nomakhelwane bebakhunkula. Umthombo uthi nyakenye kwavela ezithi uMaNgubane wabonakala komunye umuzi
wakwaDlamuka, phakathi kwamabili, ebelethe imbuzi – okwaqinisa izinsolo zokuthi uyaloya.
“Induna nayo ibisolwa ngokuthi isingenile kulo mkhuba, yelekelela umkayo,” kusho umthombo.
Uthi kawukho umbango wobuduna owaziyo obukhona, ngoba uDlamuka ubekwe kulesi sikhundla kujatshulwe ngaye.
ILANGA likhulume noNkz Sphiwe Dlamuka ongudadewabo wenduna, othe emuva kokuba uDlamuka nomkakhe sebebulewe, kufike izingane zomfowabo ezincane ziyobika ngesigameko, zicela ukuba kuyobhekwa abazali bazo ukuthi banjani.
Ebuzwa ngezinsolo zokuthakatha kwalo mndeni, uthe akaqali ukuzwa ngazo. “Umka mfowethu wake wangibikela ukuthi kuthiwa uyathakatha. Mina-ke kangikholelwa kulezo zinto, kodwa nasekhaya kubo lapho ezalwa khona (uMaNgubane), wababikela ukuthi usolwa ngokuthakatha,” esho.
Okhulumela amaphoyisa KwaZulu-Natal, uConst Thenjiswa Ngcobo, usiqinisekisile lesi sigameko, wathi amaphoyisa avule amacala amabili okubulala. Uthe bekungakaboshwa muntu, kanti amaphoyisa aphansi phezulu, athungatha umkhondo wabasolwa.
mthobisis@ilanganews.co.za
