ISILO uMisuzulu kaZwelithini sishaye ingwijikhwebu izolo, ngoLwesibiili, sabuyisela uMfundisi Thulasizwe Buthelezi (osesithombeni), esikhundleni sokuba nguNdunankulu kaZulu.
Ngonyaka odlule, ngesikhathi kukhunjulwa iMpi yaseSandlwana, iSilo samemezela uButhelezi njengondunankulu, nesekela lakhe iNkosi uPhathisizwe Chiliza. Ngosuku lukaKhisimuzi, ngonyaka odlule, iSilo sabuye sashintsha umqondo, sathi siyamdiliza uButhelezi esikhundleni sakhe, kodwa akekho owabekwa kulesi sikhundla.
UButhelezi, obuye abe nguNgqongqoshe wezokuBusa ngokuBambisana nezoMdabu KwaZulu-Natal, ufungiswe esigodlweni eMashobeni, oPhongolo, izolo ngoLwesibili. Esitatimendeni esikhishwe izolo, kuthiwe uButhelezi uzosebenza nomkhandlu osazoqokwa, ezokwaziwa ngePrime Minister’s Executive Council.
“UMfundisi Buthelezi uzosebenza nalo mkhandlu ekwenzeni imisebenzi yesizwe, njengondunankulu waso. Azikho izinqumo azozithatha eyedwa, engabonisananga namalungu omkhandlu. Lokhu kwenzelwa ukuthi isakhiwo sobukhosi, sihambisane nezinto ezenzeka esikhathini samanje,” kusho isitatimende.
ISilo kuthiwa sathola ingcindezi kwabathile ngonyaka odlule, ngokunika uButhelezi isikhundla sobundunakulu, ngoba bethi unguSopolitiki njengoba esesigungwini esiphezulu se-IFP). NeNkosi uChiliza eyisekela likandunankulu, ingumholi woMkhonto weSizwe Party (MKP), esiShayamthetho saseKZN.
menzi.jele@ilanganews.co.za
