INKANTOLO yeSifunda yaseVryheid igwebe udilikajele umdlwenguli, uJoseph Lebenya (41) ngoLwesibili yaphinde yamnika iminyaka emihlanu ngecala lokugqekeza awenza elokishini iBhekuzulu, eVryheid ngomhlaka 17 kuZibandlela (December) 2023.
Kuleli cala kuthiwa owesifazane oneminyaka engu-61 wayelele ebusuku ngesikhathi evuswa umuntu owayemthintathinta. Ngesikhathi esazama ukubheka ukuthi kwenzekani, umuntu ongaziwa wamvala umlomo ngesandla ukuthi angamemezi wamkhumula wase eyamdlwengula. Kuthiwa umdlwenguli wayengene ngefasitela.
Eseqedile umdlwenguli kuthiwa batholana phezulu nalo wesifazane belwa wagcina ekwazile ukubaleka kodwa kwasala iJacket yomdlwenguli kulo wesifazane. Ephaketheni leJacket kuthiwa kwatholakala umakhalekhukhwini. Udaba lwabikwa emaphoyiseni eVryheid idokodo ladluliselwa oPhikweni lwamaPhoyisa i Vryheid Family Violence Child Protection and Sexual Offences Unit (FCS ukuthi aliphenye.
Ngophenyo olwenziwa amaphoyisa akwazi ukuthola ukuthi umenzi wobubi uJoseph Lebenya. Ngaleso sikhathi uLebenya wayesebalekile endaweni. Ngenhlanhla amaphoyisa akwazi ukugcina embambile ngomhlaka 15 kuNhlaba (May) ngo-2025, wathweswa amacala futhi wanqatshelwa nebheyili.
Icala liqhubeke enkantolo yeSifunda yaseVryheid lagcina limgojelile. Ngokunjalo inkantolo iphinde yamnqabela ukuthi aphinde aphathe isibhamu.
