LUCKY CAIN
UPHENDULE ngencwadi yabameli uSihlalo weNFP oyimeya yaseDumbe, uMnu Msawenkosi Mkhabela (osesithombeni), emuva kwencwadi eqhamuka kumengameli waleli qembu, uMnu Ivan Barnes, ebimphoqa ukuba achaze ukuthi kungani kumele angamiswa esikhundleni sakhe.
Ngeledlule uBarnes ubhalele uMkhabela emuva kokungalubhadi kwakhe emihla-nganweni yaleli qembu. Kule ncwadi uBarnes uthe ngokomthetho weqembu, isenzo sikaMkhabela siphoqa ukuba athathelwe izinyathelo.
UMkhabela uphendule ngencwadi yabameli, wachaza uhlangothi lwakhe.
Ethintwa uBarnes, uvumile ukuthi uyithumele le ncwadi, kodwa wathi makuxhunyanwe nephini likamengameli weNFP, uMnu Milton Sokhela.
USokhela uthe beyisigungu esiphezulu bazimisele ngokuthola incazelo kuMkhabela ngokushaya indiva imihlangano yeqembu. Uthe bayitholile incwadi yabameli bakhe, kodwa ngokwabo bebengakaboni ukuthi lolu daba selungangenelelwa ngabameli. “Besibheke ukuthi kube nendlela yokuxoxa ukuze sifinyelele emnyombeni, ngaphandle kokusebenzisa ingalo yomthetho,” kusho uSokhela.
ILANGA lihabule ukuthi ziyaqonga izinkinga zaleli qembu njengoba kunoqhekeko ebuholini balo, ikakhulukazi KwaZulu-Natal, lapho liholwa nguNkk Mbali Shinga ongungqongqoshe wezokuthuthukiswa komphakathi. Kuzokhumbulela ukuthi kube nemicimbi yaleli qembu lapho uNkk Shinga ebeyisikhulumi sosuku ebisoPhongolo naseDumbe. Kuvele ukuthi ukuba khona kwale micimbi kakwehlanga kahle esigungwini sikazwelonke.
