UNGQONGQOSHE wezeMali eNingizimu Afrika, uMnu Enoch Godongwana, uzokwethula isitatimende sesabelomali, ngaphansi kwengcindezi yesimo somnotho esinzima emhlabeni ngenxa yempi esaqhubeka phakathi kwe-United States of America ne-Iran.
NgoLwesithathu uGodongwana kulindeleke ukuba ethule lesi sabelomali saphakathi nonyaka engaphansi kwengcindezi kwazise uphethiloli nodizili kusaqhubeka nokumba eqolo, kanti kulindeleke ukuba kuqhubeke nokwenyuka njengoba kuyiwa emaholidini okuphela konyaka.
USolwazi Bonke Dumisa ongumhlaziyi wezomnotho, uthe uGodongwana uzothwala kanzima njengoba kumele enze izinguquko zesabelomali saphakathi nonyaka ngesikhathi lapho kulindeleke ukuthi abe “nguMsamariya Ocwebileyo”, ukwethula umthwalo emahlombe abantu bakuleli. Uthe uGodongwana wethula lesi sitatimende lapho elakuleli libheke okhethweni lohulumeni basekhaya, futhi uphethiloli nodizili kusaqhubeka nokwenyuka.
“Nakuba ngingaboni ukuthi kukhona angakwenza ukwehlisa umthwalo kubantu, kodwa engikusolayo wukuthi angakwazi ukwenza isaphulelo sokuthi abantu bangakhokhi kakhulu ngokunyuka kukaphethiloli nodizili. Nakuba lokhu kungaba yisikhathi esifushane ngoba nohulumeni ubhekene nenkulu ingcindezi ngasohlangothini lwemali,” kusho uDumisa.
Uthe okumele abantu bakuqonde wukuthi uhulumeni waseNingizimu Afrika awunayo imali. UDumisa uthi iNingizimu Afrika njalo ngonyaka ikhokha inzalo ka-R370 billion, kanti babalelwa cishe ku-8% abantu abakhokha intela ngokusemthethweni.
“Kulo 8% asibabali labo abadla izambane likapondo abadojayo, okuyibona okumele ngabe bayakhokha ngokugcwele intela. Kule mali etholwa kulo 8%, kumele yenze konke okuhlanganisa lesi sikweletu kuya kulabo abathola imali yesibonelelo ngokwehlukana kwabo,” esho.
UDumisa usole uMengameli waseMelika uMnu Donald Trump ngokudala umonakalo emazweni akhiqiza uwoyela omningi emhlabeni okubalwa i-Iran neVenezuela. Uthe kusazoba nzima oquqabeni njengoba kusazokwenyuka izimpahla ezitolo esikhathini lapho kubhekwe khona emaholidini kaKhisimusi.
