AMAPHOYISA aKwaZulu Natal athungatha abasolwa abadubule babulala abantu abawu-8 endaweni yaseZama esigcemeni sakwa-U eMlazi ngoLwesihlanu ebusuku.
Ngokusho kwamaphoyisa abizwe kule ndawo afica kulele uyaca abesilisa abawu-6 nabesifazane abawu-2 sebebulewe.
Okhulumela amaphoyisa aKwaZulu Natal uColonel Robert Netshiunda uthe abashonile bebeseminyakeni aphakathi kuka-22 no-40 ubudala.
Uthi babikelwe ukuthi izisulu bezizihlalele ngaphakathi komunye wemijondolo ngesikhathi kugasela abasolwa abangaziwa bevulela ngenhlamvu kwalala uyaca.
“Uphenyo luyaqhubeka ngembangela eholele kulesi sigameko njengoba amaphoyisa aseqalile ukuthungatha abasolwa,” kusho uNetshiunda.
Uthe amaphoyisa anxusa noma nguba ongaba nolwazi ngokwenzekile nembangela axhumane nawo esiteshini samaphoyisa esiseduze noma ashayele le nombolo ethi 0860010111
