UKHATHAZEKILE umndeni wakwaMjilo, eHlokozi, eHighflats, ngendodakazi yawo uNkz Ayabonga Mjilo (23) egcine ukubonakala ngosuku olwandulela uKhisimusi.
ILANGA libikile nangoMsombuluko ngokunyamalala kwale ntokazi okuthiwa igcine ukubonakala endaweni yokudla eMhlanga Rocks, eThekwini.
Udadewabo ka-Ayabonga, uNkz Zinhle Mjilo, utshele leli phephandaba ukuthi sekuyabakhathaza ukungabikhona komkhondo ngokunyamalala kadadewabo ngoba akayena umuntu ochitha isikhathi eside engaxhumani nomndeni wakhe.
“Unengane eneminyaka emine ehlala kwayise wayo, okungapheli isikhathi eside engakhulumile nayo. Siyacela kwabangaba nolwazi ngokwenzeke kuyena bazise amaphoyisa. Sibikile nasemaphoyiseni aseGreenwood Park, eThekwini,” kusho yena.
Okhulumela amaphoyisa KwaZulu-Natal, uColonel Robert Netshiunda, ucele abangaba nolwazi ngokunyamalala kuka-Ayabonga ukuba baxhumane namaphoyisa.
