UMASIPALA weTheku udalule ukuthi usukulungele ukwamukela izinkumbi zezihambeli ezahlukene emkhakheni wezokuvakasha ezilindeleke ukuba zithelekethe kuleli doloba kusukela ngesonto elizayo ukuzothamela ingqungquthela yaminyaka yonke ebizwa nge-Africa Travel Indaba.
Le ngqungquthela kulindeleke ukuthi iqale ngomhla ka-11 ize iphothulwe ngomhla ka-14 kwephezulu njengoba izobanjelwa eNkosi Albert Luthuli International Convention Centre (ICC) naseDurban Exhibition Centre.
IMeya yalo masipala uMnu Cyril Xaba uveze ukuthi iTheku seliphenduke ikhaya lokusingatha imicimbi emikhulu esezingeni lo mhlaba.
Uthe nakuyona le ngqungquthe esiyaliphendula ikhaya layo iTheku akukho okuzoshintsha njengoba belindele ukuqhubeka nokuyisingatha ngempumelelo njengoba behlale benza kusukela yaqala ukwenzela kuleli dolobha.
UXaba ubekhuluma emcimbini wokwethulwa kwalo mcimbi ngokusemthethweni eNelson Mandela Cruise Terminal ngoMsombuluko obuhanjelwe uNgqongqoshe wezokuVakasha kuzwelonke uNkk Patricia De Lille noNgqongqoshe wezokuThuthukiswa koMnotho ezokuVakasha nezeMvelo KwaZulu Natal uMfu Musa Zonde nezinye izicukuthwane ezahlukene.
Umkhakha wezokuvakasha eThekwini usaqhubeka nokudlala indima emqoka ukuthuthukisa umnotho waleli dolobha.
Kuzokhumbuleka ukuthi ngeledlule leli dolobha lamukele izinkulungwane zezivakashi ebezizothamela umcimbi weMetro FM Music Awards e-ICC nasePeoples Park eMoses Mabhida lapho bekunedili lo mcimbi wokujuxuxa obekuboshelwe abaculi noDJ abahlukene.
Ingqikithi yale ngqungquthela yalo nyaka izobe igxile ekukhuliseni umnotho wezwekazi i-Afrika njengoba isihloko sayo sithi Unlimited Africa: Growing Africa’s Tourism Economy
