Uphume eceleni kunabafowabo abacula umaskandi wakhetha i-Afro Pop uZamikhaya Ndawose osanda kukhipha ingoma entsha esihloko sithi Impumelelo.
UZamikhaya ozibiza ngoZamz Mtag emculweni uthe umfowabo owaziwa ngelika-Automatiq emculweni ushaya umaskandi.
“Umculo into esikhule ngayo ekhaya ngoba ubaba ubedlala isigingci. Sonke nabafowethu sigcine sicula kodwa mina ngakhetha i-Afro Pop ngoba ngiyithanda,” kusho le nsizwa eneminyaka ewu-35 ubudala.
Ithe yakuzwa kulula ukudlulisa umyalezo nge-Afro Pop ngoba ayibhali ngisho ukubhala izinhlamvu ziyazifikela.
“Umculo ngiwuthatha njengento yokugqugquzela abantu ngoba angikhulumi ngothandon njengabanye. Ngikhuluma ngokwenzekayo ngibuyise nethemba,” usho kanje.
Uthi ithemba yinto abambelele kuyo naye njengoba eqhuba umculo kulandela ukungawutholi umsebenzi kade eqeda iziqu ze-Information Technology.
“Lolo lwazi lwami lwama-computer lungisize kakhulu ngoba ukuphrojusa bengizifundisa ngokubuka ama-video kuYoutube ngengeza kulwazi engiluthole ekhaya. Manje ngiyazibhalela, ngiya projusa bese ngiya mastarisha mina ngoba ngine studio sami.”
Uthe kungekudala uzokhipha i-EP ngoba unezinye izingoma azenzile.
