UZOPHENDUKA owokuqoqa inzuzo azolekelela ngayo emphakathini, umculi kamaskandi uKhuzani “iNdlamlenze” Mpungose, ngomcimbi wakhe obizwa ngeBlue Nation Festival, ozokuba seCarnival City, eGoli mhla ka-2 kuNhlaba (May).
UKhuzani uthi nyakenye usungule lo mcimbi ngenhloso yokugubha iminyaka ewu-15 eyibambile kwezomculo. Uthi ngenxa yokubona usizi olubhekene nentsha eswele imali kwezemfundo, uthathe isinqumo sokuthi awubuyise kulo nyaka, kodwa kube wumcimbi osuzoqoqa imali yokunikela emkhakheni wezemfundo.
“Baningi abantu abangibhalela imiyalezo, becela usizo ngokwehlukana kwezinkinga zabo. Engikuqaphelile wukuthi abaningi izinkinga zabo zithinta izikweletu ezikoleni zemfundo ephakeme, okwenza bangakwazi ukuqhubekela phambili. Abanye bahlezi emakhaya ngoba kayikho nemali yokubhalisa. Lokhu-ke kungenze ngabona ukuthi lo mcimbi makube ngowokunikelela abafundi,” kusho uKhuzani.
Kulo nyaka ilinganiselwa ku-R100 000 imali anikele ngayo, eyicozulela abathumele izicelo becela abaxhase. Omunye wabafundi obeswele, ushicilelwe kulona iphephandaba ILANGA kulo nyaka. Wamxhasa ngo-R10 000, ukuze ayobhalisela iziqu zobudokotela enyuvesi yaKwaZulu-Natal (UKZN), ophikweni iNelson Mandela School of Medicine.
“Umnikelo engiwukhiphe kulo nyaka, bekuyimali yenzuzo ye-All White Gcwalisa ngoba ngangithembisile nyakenye kuLwezi (November) ukuthi nakuyona ngiyosiza abaswele. Okwehlukile-ke wukuthi iCarnival City sekuzoba yiwona umcimbi wabantu wokubuyisela emphakathini, ngokuthi inzuzo yawo ngiyigxilise ekufakeni isandla emphakathini,” esho.
Amathikithi omcimbi aqala ku-R200 kuya ku-R300. Uthi njengamanje asethengiwe awu-2000. Atholakala eWebtickets nasePick n Pay.
